عطشان يا صبـــايـــــــــــــا

بقالنا اسبوعين وأكتر دلوقتى فى أزمة مياه الشرب فى قرى ومحافظات مصر ، والغريب فى الموضوع ان مجلس الوزرا ما اجتمعش ولا مرة من بداية الازمة الا بعدها بحوالى 12 يوم

وطلعوا يقولوا لينا ان الازمة فى طريقها للحل !!!! يا فرحتى ، والناس اللى ها تموت من العطش دى تعمل ايه ؟؟

انا اعرف ان الناس ممكن تستحمل الجوع بس ما فيش بنى ادم يقدر يقعد اكتر من 12 ساعه من غير لما يشرب

ولما يشرب بعد المده دى بيقربعله تلات اربع ازايز ميه

انما الغريب فى الموضوع ان ثلاث رجال الاعمال فى الامارات واميرة سعودية واخرين بيتبرعوا للمصريين بكراتين مياه معدنيه بواقع كرتونه لكل اسرة والتوزيع بيكون بالبطاقه الشخصية وكان ده فى قرية واحده بس فى بشبيش فى المحلة الكبرى

انما الخبر اللى سمعته وكنت عاوز اخش بعد ما سمعته الحمام : ان احد المسئولين يحذر المواطنين من الافراط من شرب المياه وعدم اهدار المياه واستخدامها فقط للشرب دون استخدامها فى الحمام مثلا أو الاكل او الغسيل !!!!! يا بجاحتك يا اخى واللى قال كده مسئولين من المحافظة

وبعدين السيد وزير الاسكان الذى احترمه واقدره كثيرا وعد بحل ازمة المياه فى القرى والمناطق المحرومه فى غضون خمسة اشهر !!!! يا

سيادة الوزير أحمد المغربى انى احترمك جدا واقدر مجهودك ولكنك لم تتعامل مع الازمة بطريقة تتطمئن الناس الغلابة اللى موش لاقيين يشربوا

طيب والاراضى الزراعية ها تتروى ازاى ؟؟؟ وطبعا المحاصيل اللى باظت مين اللى ها يتحمل تمنها ؟؟؟؟ طبعا الفلاحين هما اللى ها يتحملوا الخسارة وخراب البيوت

والاغرب فى الموضوع ان بعد ما وصلت عدد القرى المحرومة من المياه الى حوالى 12 قرية فى خمس محافظات ان بعد ما الناس الغلابة شافت ان ما فيش فايدة من النداءات والاستغاثات والترجى قرروا يعملوا مظاهرة واضراب جماعى عن الطعام

قوم ايه الامن فى محافظة الدقهليه يهددهم ويخيرهم اما بفض المظاهرة او الاعتقال ؟؟؟؟؟

حتى انا بكلم واحد صحبى من المحله وسالته عن سعر الميه المعدنيه قاللى الميه المعدنيه فى المحله الازازة اللتر بتتباع بسعر 3 جنيه وفى اماكن تلاقيها بخمسه؟؟؟ والكلام على لسان اللى قاللى موش لسانى انا

عجبت لك يا زمن
حتى الميه موش لاقيين نشربها وبنتسول الميه من رجال الاعمال الخليجيين والعرب ؟؟؟؟؟

وأصبح لسان حالنا بيقول دلوقتى : خلى الغلابة يدوقوا و يشربوا الميه المعدنيه

ورجعت تانى بحكاية من ما رينا

ظروف الشغل والدراسة والامتحانات والسفر هما اللى منعونى من التدوين ..... بس بجد والله التدوين وحشنى جدا جدا جدا والكتابه لانى فعلا حسيت انها بقت عادة فيا وانها الحاجة الوحيدة اللى بقدر انفس فيها عن نفسى

المهم من غير ما اطول رجعت تانى ويا ريت ما بقاش تقييييل بس الظروف بقه

كنت من يومين فى مارينا ( عقبال عندكم ) رحت نص يوم خطف كده ورجعت وانا هناك اول لما رحت دخلت السوبر ماركت اشترى منه شوية لوازم للعائلة الكريمة اللى مستقرة هناك بقالها اسبوع ولسه فاضلها اسبوعين كمان وقلت بالمرة اشترى كام جرنال اتسلى بيهم وانا قاعد على البحر طبعا لقيت الاهرام والاخبار والمساء والجمهورية والاهرام المسائى ومجلات الاهرام الرياضية والكواكب ، فسالت الراجل ما عندكش الدستور ؟ قال لى لأ

طيب عندك المصرى اليوم ؟ قال لى لأ برده

موش مهم عندك صوت الأمه؟ قاللى انت بتسال على جرايد غريبة !!!!!!!

قلت له هى الدستور والمصرى وصوت الامه بقت حاجة غريبة ؟؟ انت اول مرة تسمع عنهم ؟؟؟

قال لى سمعت طبعا بس الجرايد دى ممنوعة هنا .... قلت له نعم ممنوعه هنا ازاى؟؟؟

قاللى ممنوعة فى مارينا بوابة خمسه

استغربت جدا وقلت له اشمعنى يعنى ما رينا بوابة خمسه ؟؟

قاللى علشان لسان الوزرا وكل الشخصيات المهمة هنا فى بوابة خمسه فى لسان الوزرا

قلت له طيب شكرا فاشتريت مجلة ميكى جيب ومشيت

وبعد ما خرجت رجعت له وسالته هو لسان الوزرا ده فين ؟

قاللى ها تمشى على طول كده وتخليك ماشى لغاية لما تلاقى الفلل والقصور عليها علم مصر وقاللى ساخرا ... اصلهم بيموتوا فى دباديب مصر

ورحت ركبت العربية ووالدتى جنبى ومشينا على طوووول لحد ما وصلنا الفيلا ( اللى مأجرينها ) وببص عليها وبستمتع بجمالها الاقى كل صف الفلل اللى بعدينا وقبلينا كلها معلقة اعلام مصر

المهم حكيت للعائلة الحكاية وضحكوا وقالولى ولا كنا ها نعرفك لو اتمسكت بالدستور او صوت الامة او المصرى اليوم

المهم عدى الموضوع وفطرت وقولت انزل اقعد على البحر شوية اشرب سيجارة واصور كام صورة للبحر ... المهم رحت للبحر وباصور البحر وشوية الاقى بيتش باجى ( موتوسيكل رمال معدى ) وكان اللى سايقه لابس بدله وعدانى وشوية رجع لى وقاللى ممنوع التصوير من هنا يا استاذ

قلت موش ناقصه وجع دماغ ومشيت واعتقد انه من حرس احدى الشخصيات الهامة

وموش قادر اتخيل ان مجموعة من الناس تتحكم فى الناس اللى هناك كلها حتى الجرائد حتى القراءة منعوها وكل ده بامر كام واحد ولا يسووا

حاجة بقت تقرف فعلا وقعدت افكر ليه بس بيحصل معانا كده ده احنا على راى محمود عبد العزيز فى فيلم ابوعلى ( ده انا حتى بحب مصر ) وبعدين انا ماشى بالليل لقيت خير اللهم اجعله خير شاطىء عراه اسمه كابيلا كابيلا او حاجه شبه كده وكنت رايح اركب السوبر الجيت اللى راجع القاهرة علشان الشغل وكانت الساعه 10 بالليل تقريبا لقيت الشاطىء ده وعليه كمية حراسة بالهبل ما شفتهاش فى المظاهرات كلهم شيك وبودى جاردات بمعنى الكلمة ودول فى حفله تحت تحت الاضواء وعريانين يا لهوى كل ده فى مصر؟؟؟؟

انا كنت اعرف ان هنالك شاطىء عراه ( اللى شفته ) فى شرم الشيخ انما فى ما رينا كمان ؟؟؟؟؟

يا سبحان الله وعرفت كل اللى بيحص فينا ده ليه

عرفتم ولا لسه ؟؟؟؟؟؟؟؟

هذا ليس ذنب مبارك

هذا ليس ذنب مبارك

انا عارف ان ممكن العنوان يكون صادم .. بس ارجوكم استحملونى وشوفوا افكارى ماشية فين
نعم هذا ليس ذنب مبارك ، ممكن ناس تقول عليا ( عبيط أو عميل أمن ) علشان بدافع عن مبارك ... او ممكن خايف من اللى حصل للمدون عبد الكريم عامر الشهير بكريم عامر انه شتم مبارك واخذ سنة سجن .
بس ده موش خوف ولا جبن دى الحقيقة .. ايوة الحقيقة المرة اللى الناس موش عاوزه تصدقها او موش عاوزه تعترف بيها ...
مبارك مالوش ذنب فى كل اللى بيحصلنا مع انه يتحمل جزء ليس بالصغير ، ولكن السبب الاساسى هم من حول مبارك ، انهم من يقولون له ان الشعب بيحبه وموش عاوز حد غيره.
نتكلم بالتفصيل وبشكل اكثر دقه ...
لما تكون رئيس مجلس ادارة مجموعة شركات كبيرة جدا ولها فروع كبيرة وكتيرة وفى كل مكان ، طبعا موش ها تقدر تلف على موظف موظف تساله ايه اللى مضايقك وايه اللى عاجبك ونفسك فى ايه وما نفسكش فى ايه ؟؟؟؟ طبعا ها يكون لييك مجموعة من النواب ، وطبعا برده النواب موش ها يقدروا يقوموا بالدور اللى انت مفروض تعمله ، فطبعا ها يكون فيه رؤساء كل واحد منهم برده موش ممكن ينفذ الدور اللى انت ما قدرتش بيه ، اكيد هاتلاقى فى كل فرع من فروع الشركة مديرون عموم ومديرون ورؤساء مكاتب ورؤساء قطاعات ، ومدير لكل ادارة .. المفروض بقه نبدأ من هنا..
**رئيس المكتب يبلغ المشاكل للمدير وطبعا موش ها يبلغها علشان ينول رضاه ويحسسه ان الناس مستعده تبوس جزمته وجزم من فوقه !!!!

**نيجى للمدير ها يبلغ المدير العام انهم كلهم بيحلموا بيه وبيزدادوا كل يوم حبا وعشقا له وللرئيس !!!!!

**نيجى للمدير العام ها يبلغ مدير الفرع ان الموظفين راضيين وبيحبوه جدا ويزدادوا ولع بيه !!!!

**ها ييجى المدير العام يبلغ رئيس الفرع او القطاع ان كله تمام التمام!!!!

**هاييجى رئيس الفرع يبلغ نواب رئيس مجلس الادارة ان كله على مايرام وان الامن مستتب !!!!

**ييجوا بقه اخوانا نواب رئيس مجلس الادارة ومساعديه يقولوا للرئيس ( رئيس مجلس الادارة ) ان الشركات تمام التمام وزى الورد وميت فل وخمسة وعشرين !!!!

وهو بقة ( رئيس مجلس الادارة ) يتخذ فى قرارات على اساس التقارير اللى بتوصله ، ولما يلاقى حركة تمرد اخوانا اللى بيبلغوا بالاخبار يقولوا دى زوبعه فى فنجان !!!!!

**وده كله ليه ؟؟؟؟ طبعا كل واحد بيتقرب وبينافق اللى فوقيه لعلهم ينولوا رضاه.... عجبى على الزمن

المفروض فى مصر الحكاية ماشية ازاى ؟؟؟
اقولكم ماشية ازاى :

*أعضاءالمجالس المحلية
*رئيس المجلس المحلى
*نواب المحافظين والوزراء ورؤساء المدن
*الوزراء
*نواب رئيس الوزراء
*رئيس الوزراء
*نواب الرئيس
*الرئيس


عرفتوا بقه الذنب ذنب مين ؟؟؟؟؟؟؟

هذا ليس ذنب مبارك ، وعلشان نكون منصفين برده الذنب موش ذنبنا

اعذرونى

اعذرونى

اعذرونى للتاخير فى التدوين مع اننى لك اكن معتاد على افوت على نفسى او عليكم حدث ولكن ظروف قهرية دعتنى الى ذلك فاعذرونى وانتظروا مدونه كلام حر بشكل جديد كليا وتطوير سيعجبكم ان شاء الله

بتفهم سيــاســــــه ؟؟؟؟؟

بتفهم سياســــــة ؟؟؟؟

-

"بتفهم سياسة يا ولا يا مزيكا ؟؟
ااه طبعاً ، أنا الشعب ..
لا صحيح ياواد يا مزيكا ؟؟
ااه السياسة هى يا بخت من وفق راسين فى الحلال !!!
لا دى سياسة أمك !!!! " هذا مادار فى جزء من مسرحية المتزوجون

--

هل احنا صحيح بنفهم سياسة ؟؟؟
ولا وخدينها موضة ؟؟؟ ولا بنعملها من باب البرستيج او الوجاهة الاجتماعية ؟؟؟
احنا بنعمل كده ليه ؟؟

--

الموضوع او العدد ده مقسم لجزاين الجزا الاول ما كتبته أناوالجزء الثانى قصيده كاتبها على الفيل انتقيت منها ما يناسب الموضوع وما هو واقع فى حياتنا


كلامى ده كان بمناسبة حاجتين مهمين من وجهة نظرى
الاول وهو موضوع وائل عباس واللى نشره عن ثورة الهياج جنسياً واللى رد عليه فى روزاليوسف كرم جبر رئيس مجلس الادارة ( وانا عمرى ما شفتش رئيس مجلس الادارة بيكتب مقالات ) وكتبه عنه ايضا فى اخبار اليوم امس مقال او حديث على نصف صفحة تقريبا بالصور اللى مصورهاوائل عباس
الثانى وهو حوار مفيد فوزى مع منى الحسينى فى رمضان واللى اتعاد من يومين برنامج نأسف للإزعاج

الموضوع الأول

--

الموضوع الذى نشر بروزاليوسف عن الموضوع اللى كان وائل عباس عامله وهو ثورةالهياج جنسيا فى وسط البلد وكتابة مقال بالصفحة الاخيرة وكلكم طبعا تعرفوا يعنى ايه مقال لكاتب فى الصفحة الاخيرة باى جريدة لاوايه كمان ده كرم جبررئيس مجلس الادارة.. بيهاجم وائل وامثاله ان احنا بنحاول نظهر الوجه القبيح فى المواطن المصرى وان وائل كذاب وده عمره ما يحصل وان الامن مستتب والشرطة منتشة فىكل مكان سواء سرية او علنيه ، مع انى والله شفته بعينى لاوفى كذامكان فى وسط البلد وكل عيد تقريبا بشوف ده وامام الجميع .. واخذ مدافعا عن المواطن المصرى ( ياعينى المواطن المصرى اللى هواصلا عمره ما شافه ولاحس بيه قبل كده ) يا سلام على حبك للشعب وده شعب ما فيش زيه !!! من امتى انتم بتحسوا بينا ( على اساس انى من الشعب ، أو موطن درجة خمستاشر ) ما علينا ... انتم ما بتحسوش انكم عاوزين تعملوا حاجه بعد ما تكتبوا الكلام الهايف والعبيط اللى انتم بتكتبوه ده على اعتبار يعنى انكم بتكتبوا اصلا ( مجازاً يعنى ) او الى انتم بتهببوه ده .. انا بصراحه نفسى اشوفكم وانتم فى بيوتكم على طبيعتكم ومراتاتكم بتشبشبلكم وانتم عاملين فيها الاربعين راجل فى بعض وعاملين نفسكم الامرون الناهون يا سلام نفسى اشوفكم وانتم بتطرقعوا من ستاتكم إذاكان ليكم ستات !!!!


الموضوع الثانى

--

وهو خاص بالاخ مفيد فوزى والاخت منى الحسينى فى برنامج ناسف للازعاج اللى قدمته فى رمضان على قناة دريم 2 ، حظى المنيل خلانى اشوف الحلقه بتاعة م؁يد لا وايه شفتها مرتين وقال فيها كلام المفروض انه طالع من ( راجل ) ليه اسمه
آل ايه بيقول انه بسلامته بيستاء جدا جدا عندما يقرا شىء عن السيد الرئيس وابنه !!!!!
ياحبيبى يا مستاء ... ااه والله الكلام قاله بالحرف وآل ايه كمان ان المعارضة فى مصر ادت الى فوضى !!!!
وآل ايه كمان الفوضى دى آل ايه ( خلى بالك من اللى جاى ) نتيجة زيادة مساحة الحرية !!!!!!!!!!!!!!!!!!!!!!!!!!!!!!!!!!! وآل ايه ان الناس فى الشارع تجاوزوا الخطوط الحمرا وتجاوزا سقف الحرية !!!!! يا سلام وايه كمان بقى ان الحرية اتحولت لفوضى
لا اسمع بقى اللى يفقعك اكتر لما منى الحسينى سالته قالت له الفوضى دى نتيجة ايه قالها : ان ده تطنيش من النظام وقيادته الحكيمة لشعبها وشعب مصر وان ده دليل على الحرية؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟


آآآآآآآآآآآآآآآآآآآآآآآآه يا بلد



الجزءالثانى

--

قصيده بدون عنوان كتبها على الفيل انتقيت منهاما يناسب الموضوع وما هو حادث فى واقعنا


فى لحظة حزن ويأس مما يحدث ...كتبت

أحلف بأنى زهقت
طقيت من اللى جناب
من اللى حاصل أنا
الشعر منى شاب
أصل الحكاية ما تسوى
من الألف .. للياء
وإنزل هناك على البورصة
راح تلتقيها خراب


اللعب على المكشوف
وآهوكله سبوبه
فتح عيونك شوف
دى حكاية مقلوبة
من اليمين لليسار
يا قلبى لا تحزن
مرض الكبار انتشر
وبهية مرعوبة


ما عدت عارف يا صاحبى
أصل الحكاية إيه ؟
سوق السياسة جبر
والكل عامل بيه
بين اللى بايع واللى شارى
والمنفعه بالدور
واللى عليه الدور
على ضهرنا تلاقيه

سلملى على البوسطجى
الحال بقت طينه
وهاتلى يا عفيجى
إصلاح فى خمسينه
عارض يعارض معارض
والنظام وياه
بشبشها يا سلطجى
تورته وسكينه


وآهين يا بلد العجايب
شايب وفى الروضه
ركيبة وركايب
ونضال على الموضه
هوجه تقوم تنتشر
وف لحظة ما تلاقى
غير العبر فى البشر
والباقى فى الاوضة


واسمع وشوف يا ولد
فيه كاميرا بتصور
وكاس فى شرف البلد
بس اوعى تتهور
الشيشه متدلعه
والكل بيناضل
سلامات على المرقعه
والفرقعه تعور


شلليه ويا صحاب
ولا فى حب الوطن
ام كانت المنفعه
جامعه اللى موش نافعين
سلام مربع نضالى
للهانم الخفه
والبيه ينادى تعالى
يا محافظة على العفه
بعد المظاهرة سهرة
والكاسات بتدور
وآهو كله لاجل الوطن

ملعون ابوك ياكلام
لو كنت على الفاضى
او منظرة وفشخرة
يا حاضر بلا ماضى
هيه الحكايه إيه ؟
حاورينى ياطيطة
دى زاطت وهاصت
قوى .. وياح بقى ماضى


قالو الشباب الأمل
قلنا بلا خيبه
قالو وإيه العمل
قلنا لعيبه
عدوى وبين الشباب
جاية م البهوات
صابت فى مقتل بلد
يا إخوانادى مصيبه

سلام كبير يا نضال
ورقصولى الشنب
يا عم حمزة الشباب
بقى شباب العنب
بورصةويونانى وليالي
ده اللى انا عارفه
وهناك على الحرية
هتلاقى عجب العجب


أنا زيى زى الجميع
كلنا ف وكسه
والحاله صعبة أوى
أشبه كده بنكسة
سيبنا البلد للنظام
وقعدنا نتخانق
يا ميت ندامة يامصر
سكتنا ليه عاكسه


إكتب وقول يا قلم
اكتب وعيد تانى
لملم حروف الالم
من عند سجانى
مين اللى باع القضية
ومين اللى صاينها
والسكة فين يا بهية
ليه بس راميانى


أحلف بان التوهة
جاية من اللى خان
من اللى باع القضية
وفاتح الدكان
سياسة على كل لون
قرب وجرب ... وشوف
بولوتيكا م الفابريكا
يا فرحة السجان

محلاه نضال القهاوى
وانا برضه فى الحسبان
محلاه نضال الجرايد
والصورةوالعنوان
ومدونة مكتوبة
سلامات يا عم نظام
آدى المعارضة الحقيقى
والنعمة شغل جنان


إفرح قوى يا كبير
يا حضرة الفرعون
سابوك تورث إبنك
إلعب وهات الجون

هذا رأيى ... رأيي فقط

فى الاونة السابقه كثر الحديث بشكل مفزع عن العلمانيه بين مؤيديها ومعارضيها فاردت ان اكتب ما اراه من وجهة نظرى صحيحا وقد جمعت عدة كتابات عن العلمانية وجمعتها هنا لتشاركونى فكرى ... محمد السعيد

--

اولا متى دخلت العلمانية الى البلاد العربيه وكيف ؟

--

في مصر

دخلت العلمانية مصر مع حملة نابليون بونابرت . وقد اشار اليها الجبرتي الجزء المخصص للحملة الفرنسية على مصر واحداثها – بعبارات تدور حول معنى العلمانية وان لم تذكر الفظة صراحة .أما أول من استخدم هذا المصطلح العلمانية فهو نصراني يدعى اليأس بقطر في معجم عربي فرنسي من تأليفه سنة 1827 م .وادخل الخديوي اسماعيل القانون الفرنسي سنة 1883م،وكان هذا الخديوي مفتونا بالغرب،وكان أمله أن يجعل من مصر قطعة من أوروبا

الهند

حتى سنة 1791م كانت الاحكام وفق الشريعة الاسلامية ثم بدأ التدرج من هذا التاريخ لإلغاء الشريعة الإسلامية بتدبير الإنجليز وانتهت تماما في أواسط القرن التاسع عشر

الجزائر

إلغاء الشريعة الإسلامية عقب الاحتلال الفرنسي سنة 1830 م

تونس

أدخل القانون الفرنسي فيها سنة 1906 م

المغرب

ادخل القانون الفرنسي فيها سنة 1913م

تركيا

لبست ثوب العلمانية عقب إلغاء الخلافة واستقرار الأمور تحت سيطرة مصطفى كمال أتاتورك ، وان كانت قد وجدت هناك إرهاصات ومقدمات سابقة

العراق والشام

الغيت الشريعة أيام إلغاء الخلافة العثمانية وتم تثبيت أقدام الإنجليز والفرنسيين فيها

معظم أفريقيا

فيها حكومات نصرانية امتلكت السلطة بعد رحيل الإستعمار

أندونيسيا ومعظم بلاد جنوب شرق اسيا

دول علمانية . إنتشار الأحزاب العلمانية والنزاعات القومية

حزب البعث ،الحزب القومي السوري ،النزعة الفرعونية ،النزعة الطورانية ،القومية العربية

من اشهر دعاة العلمانية في العالم العربي الإسلامي

احمد لطفي السيد

إسماعيل مظهر

قاسم امين

طه حسين

عبد العزيز فهمي

ميشيل عفلق

أنطوان سعادة

سوكارنو

سوهارتو

نهرو

مصطفى كمال اتاتورك

جمال عبد الناصر

أنور السادات ( صاحب شعار لا دين في السياسة ولا سياسة في الدين )

د. فؤاد زكريا

د. فرج فودة وقد اغتيل بالقاهرة مؤخرا ، وغيرهم

الأفكار والمعتقدات

بعض العلمانين ينكر وجود الله أصلاً وبعضهم يؤمنون بوجود الله لكنهم يعتقدون بعدم وجود آية علاقة بين الله وبين حياة الانسان

الحياة تقوم على أساس العلم المطلق وتحت سلطان العقل والتجريب

* إقامة حاجز بين عالمي الروح والمادة والقيم الوحية لديهم قيم سلبية

* فصل الدين عن السياسة وإقامة الحياة على أساس مادي

* تطبيق مبدأ النفعية على كل شئ في الحياة

* اعتماد مبدأ الميكافيلية في فلسفة الحكم والسياسية والاخلاق

نشر الإباحة والفوضى الأخلاقية وتهديم كيان الأسرة باعتبارها النواة الأولى في البنية الاجتماعية أما معتقدات العلمانية في العالم الاسلامي والعربي التي انتشرت بفضل الاستعمار والتبشير فهي
* الطعن في حقيقة الإسلام والقرآن والنبوة

* الزعم بان الإسلام استنفذ أغراضه وهو عبارة عن طقوس وشعائر روحية

* الزعم بان الفقه الاسلامي مأخوذ عن القانون الروماني

* الوهم بأن الإسلام لا يتلائم مع الحضارة ويدعو إلى التخلف

* الدعوة إلى تحرير المرأة وفق الأسلوب الغربي

* تشويه الحضارة الإسلامية وتضخيم حجم الحركات الهدامة في التاريخ الاسلامي والزعم بأنها حركات إصلاح .

* إحياء الحضارات القديمة

* اقتباس الأنظمة والمناهج اللادينية عن المغرب ومحاكاته فيها

تربية الأجيال تربية لادينية إذا كان هناك عذر لوجود العلمانية في الغرب فليس هناك أي عذر لوجودها في بلاد المسلمين لأن النصراني إذا حكمه قانون مدني وضعي لا ينزعج كثيراً ولا قليلا لأنه لا يعطل قانون فرضه علية دينه وليس في دينه ما يعتبر منهجا للحياة ، أما مع المسلم فالأمر مختلف حيث يوجب عليه إيمانه الاحتكام لشرع الله .

ومن ناحية أخرى كما يقول الدكتور يوسف القرضاوي – فإنه إذا انفصلت الدولة عن الدين بقي الدين النصراني قائما في ظل سلطته القوية الفتية المتمكنة وبقيت جيوش من الراهبين والراهبات والمبشرين والمبشرات تعمل في مجالاتها المختلفة دون أن يكون للدولة عليهم سلطان بخلاف ما لو فعلت ذلك دولة إسلامية فأن النتيجة أن يبقى الدين بغير سلطان يؤيده ولا قوة تسنده حيث لا بابوية ولا كهنوت ولا اكلريوس وصدق الخليفة الثالث عثمان بن عفان رضي الله عنه حين قال ( إن الله يزع بالسلطان ما لايزع بالقرآن

الجذور الفكرية والعقائدية

* العداء المطلق للكنيسة أولا وللدين ثانيا أياً كان ، سواء وقف إلى جانب العلم أم عاداه

* لليهود دور بارز في ترسيخ العلمانية من أجل إزالة الحاجز الديني الذي يقف أمام اليهود حائلا بينهم وبين أمم الأرض

يقول الفرد هوايت هيو : ( ما من مسالة ناقض العلم فيها الدين إلا وكان الصواب بجانب العلم والخطأ حليف الدين ) وهذا القول إن صح بين العلم واللاهوت في اوروبا فهو قول مردود ولا يصح بحال فيما يخص الاسلام حيث لا تعارض إطلاقاً بين الاسلام وبين حقائق العلم ، ولم يقم بينها أي صراع كما حدث في النصرانية . وقد نقل عن أحد الصحابة قوله عن الاسلام : ( ما أمر بشئ ، فقال العقل : ليته نهى عنه ، ولا نهى عن شئ فقال العقل ليته أمر به ) وهذا القول تصدقه الحقائق العلمية والموضوعية وقد أذعن لذلك صفوة من علماء الغرب وفصحوا عن إعجابهم وتصديقهم لتلك الحقيقة في مئات النصوص الصادرة عنهم

تعميم نظرية (العداء بين العلم من جهة والدين من جهة ) لتشمل الدين الاسلامي على الرغم أن الدين الاسلامي لم يقف موقف الكنيسة ضد الحياة والعلم حتى كان الاسلام سباقاً إلى تطبيق المنهج التجريبي ونشر العلوم

إنكار الآخرة وعدم العمل لها واليقين بان الحياة الدنيا هي المجال الوحيد لماذا يرفض الاسلام العلمانية

* لانها تغفل طبيعة الانسان البشرية باعتبارها مكونة من نفس وروح فتهتم بمطالب جسمة ولاتلقي اعتبارا لاشواق روحة

* لانها نبتت في البيئة الغربية وفقا لظروفها التاريخية والاجتماعية والسياسية وتعتبر فكرا غريبا في بيئتنا الشرقية

* لانها تفصل الدين عن الدولة فتفتح المجال للفردية والطبقية والعنصرية والمذهبية والقومية والحزبية والطائفية

لانها تفسح المجال لانتشار الالحاد وعدم الانتماء والاغتراب والتفسخ والفساد والانحلاللانها تجعلنا نفكر بعقلية الغرب ، فلا ندين العلاقات الحرة بين الجنسين وندوس على اخلاقيات المجتمع ونفتح الابواب على مصراعيها للممارسات الدنيئة ,وتبيح الربا وتعلي من قدر الفن للفن ,ويسعى كل انسان لاسعاد نفسة ولو على حساب غيرة

لانها تنقل الينا امراض المجتمع الغربي من انكار الحساب في اليوم الاخر ومن ثم تسعى لان يعيش الانسان حياة متقلبة منطلقة من قيد الوازع الديني ، مهيجة الغرائز الدنيوية كالطمع والمنفع وتنازع البقاء ويصبح صوت الضمير عدما

مع ظهور العلمنية يتم تكريس التعليم لدراسة ظواهر الحياة الخاضعة للتجريب والمشاهدة وتهمل امور الغيب من ايمان با لله والبعث والثواب والعقاب , وينشا بذلك مجتمع ٍغايته متاع الحياة وكل لهو رخيص

الانتشار ومواقع النفوذ

بدات العلمانية في اوروبا وصار لها وجود سياسي مع ميلاد الثورة الفرنسية سنة 1789م . وقد عمت اوروبا في القرن التاسع عشر وانتقلت لتشمل معظم دول العالم في السياسة والحكم في القرن العشرين بتأثير الاستعمار والتبشير يتضح مما سبق : ان العلمانية دعوة إلى إقامة الحياة على أسس العلم الوضعي والعقل بعيدا عن الدين الذي يتم فصلة عن الدولة وحياة المجتمع وحبسة في ضمير الفرد ولا يصرح بالتعبير عنة الا في أضيق الحدود . وعلى ذلك فأن الذي يؤمن بالعلمانية بديلا عن الدين ولا يقبل تحكيم * الشرعية الإسلامية .في كل جوانب الحياة ولا يحرم ما حرم الله يعتبر مرتدا ولا ينتمي الى الإسلام . والواجب اقامة الحجة علية حتى واستتابتة حتى يدخل في حضيرة الإسلام والا جرت علية أحكام المرتدين المارقين في الحياة

--

هذا رأيي وانا لا اعبر عن وجهة نظر اى شخص او جهة

محمد السعيد

الفرعون والمتمرد

الفرعون والمتمرد .... هو اسم غريب لكنكم ستجدون بين السطور التى ستقرأونها قصدى مَن الفرعون ومَن المتمرد؟ وهى مجموعة من الحلقات وها هى الحلقة الاولى

ساعقد لكم قصة حياة شخصين ممن يثيرون الجدل فارجوا ممن يقرا الموضوع ان يقرأه كاملا ويجيب على تساؤلى

من هو الفرعون ومن هو المتمرد؟؟؟؟؟؟؟؟؟؟؟

-

شادى العدل ، كلام حُر


---

مبــــارك

محمد حسني سيد سيد إبراهيم مبارك (ولد في 4 مايو 1928 م)، مشهور بالاسم حسني مبارك. تولى رئاسة مصر في 14 أكتوبر 1981 م، وهو الرئيس الرابع لجمهورية مصر العربية. تقلّد الحكم في مصر بعد اغتيال الرئيس المصري الراحل أنور السادات في 6 أكتو1981 م وبذلك تكون فترة حكمه من أطول فترات الحكم في المنطقة العربية.

ولد حسني مبارك في كفر المصيلحة في محافظة المنوفية، وبعد انتهائه من تعليمه الثانوي، التحق بالأكاديمية العسكرية وتخرج منها بشهادة البكالوريوس في العلوم الحربية. وفي عام 1950 م، التحق بكلية سلاح الطيران وتصدّر دفعته بشهادة البكالوريوس بعلوم الطيران. تدرّج في السلم الوظيفي وفي عام 1964 ترأّس الوفد العسكري المصري للإتحاد السوفييتي .مابين عامى 1967 وعام1972, وخلال حرب الاستنزاف بين مصر وإسرائيل تم تعين مبارك مديراً للكلية الجوية وأركان حرب القوات الجوية المصرية, في 1972 أصبح قائد القوات الجوية ونائب وزير الدفاع.في أكتوبر 1973, قاد القوات الجوية المصرية أثناء حرب أكتوبر. وفي ابريل من عام 1975، تم تعيين مبارك نائبا للرئيس أنور السادات. وفي عام 1981، وبعد أغتيال السادات فى 6 أكتوبر, انتخب مبارك من قبل أعضاء مجلس الشعب المصرى رئيساً لجمهورية مصر العربية، ورئيساً للحزب الوطني الديمقراطي.
· مبارك متزوج من سوزان صالح ثابت والمشهورة ب سوزان مبارك, وله ولدان هما علاء مبارك و جمال مبارك وله ايضا حفيدان
أعيد انتخابه كرئيس للجمهوريـة خلال استفتاء علي الرئاسة في أعوام 1987 و 1993 و 1999 و 2005 لخمس فترات متتالية ويشك الكثير في قانونية هذا الاستفتاء لان الدستور لايسمح بتعدد المرشحين و بذلك تكون فترة حكمه من أطول فترات الحكم في المنطقة العربية

ومن الناحية الاقتصادية يعتقد البعض ان حسني مبارك لم يستطيع ان يحقق ما كان يوعد به دائما من تحقيق الاستقرار الاقتصادي وحماية محدودي الدخل بل ظل الاقتصاد يعاني حتي الان من مشاكل كبيرة وخاصة بعد تبنيه عمليات الخصخصة التي اثير حولها الكثير من الشكوك والمشاكل من حيث عدم جدوها واهدارها للمال العام .. وأنها كانت في صالح المستثمرين واصحاب روؤس الاموال فقط .. كما انه لم يستطع تحقيق معدلات معقولة من نسبة البطالة للبلد ويرجع هذا السبب الي السبب الاولي بجانب تحكم عدد قليل من أصحاب روؤس الاموال في مقدورات البلد و العمل لحسابهم الخاص

استلام الحكم 14 اكتوبر 1981

تاريخ الميلاد 4 مايو 1982

----

أيمن نــــور

--

أيمن عبد العزيز نور (10 أكتوبر 1964) معارض ليبرالي مصري ومرشح سابق لانتخابات الرئاسة في مصر, رئيس حزب الغد وعضو سابق في حزب الوفد

يبلغ 40 عاما - أسس عام 2000 حزب الغد الذي رفض من قبل لجنة شئون الأحزاب والمحكمة أربع مرات وقبل في المرة الخامسة.
و أيمن نور من مواليد الإسكندرية و قد تلقى تعليمه الابتدائي بالإسكندرية و الإعدادي و الثانوي بالمنصورة و فى الإعدادية ترأس اتحاد الطلاب الجمهورية للمدارس الإعدادية و كذلك فى الثانوية و فى الجامعة
و قد اعتقل نور أكثر من مرة فى بداية الثمانينات و قبل التخرج عمل نور بالصحافة لعدة سنوات و أصبح عضوا بنقابة الصحفيين و كان نائب رئيس تحرير جريدة الوفد لسنوات طويلة
و عمل ايمن نور بالمحاماة و الصحافة فى آن واحد بعد قرار المحكمة الدستورية بالجمع بين نقابتين و هو نائب بمجلس الشعب ن دائرة باب الشعرية
و قد دخل ايمن نور كلية الحقوق بناء على رغبه أسرته لأن والده و جده كانا محاميان ثم بعد تخرجه حصل على الدكتوراه في العلوم السياسية
و جاءت بداية عمله بالسياسة مبكرة فقد كان والده نائب من نواب مجلس الشعب لذلك شارك أيمن نور فى إدارة الحملات الانتخابية لوالده و بعد ذلك ترأسه لاتحاد طلاب الجمهورية ثم انضمامه الى حزب الوفد و الذى أصبح بعد وقت قليل من أنشط كوادره
و قد كان ايمن نور من أقرب أعضاء الحزب الى فؤاد سراج الدين الرئيس السابق للحزب إلا انه بعد تولى الدكتور نعمان جمعه لرئاسة الحزب نشأت خلافات بين الطرفين فى طريقة العمل داخل الحزب انسحب على أثرها أيمن نور من الحزب
و قد انضم بعد ذلك أيمن نور لحزب مصر و هو امتداد للوسط على اعتبار ان نور وسطى ليبرالي و تم انتخابه رئيسا للحزب فى مؤتمر عام 2001 ثم بدأ نور بعد ذلك فى تأسيس حزب جديد هو حزب الغد الذي أصبح نور رئيسا و زعيما له و أضحى من أقوى الأحزاب المعارضة داخل البرلمان
و أيمن نور استمر يمارس عمله فى المحاماة لمدة طويلة و جمع بينها و بين نشاطه السياسي لأنه على حد قوله اعتبر نفسه محامى للشعب و من ثم فالمهنتين السياسي و المحامى تعدان مهنة واحدة
و ايمن نور تزوج فى سنة ال 22 عاما من المذيعة التلفزيونية جميلة إسماعيل و له طفلين هما نور وشادى

--

إذا بعد أن قرأتم ما سبق ، من هو الفرعون ومن هو المتمرد؟؟؟؟؟؟؟